光頭 BB
尋日妹妹幫 BB 剪頭髮，本來只係想剪後面少少，阿妹就用把剪刀打橫剪後面髮尾，點知剪完出黎個形勁薯，無辦法唯有幫 BB 剃光頭。
今次 BB 無再驚剪髮啦，一來佢阿爸係佢面前剪一次，跟住一路玩一路幫佢剪，一扭計就停一停比佢玩一陣再剪，所以今次剪得好過上次好多，至少無一達達先啦。
Monday, December 10, 2007
Sunday, December 09, 2007
旺角小肥羊 + 豬 BB 女
尋晚同o左 FF o的網友去旺角「小肥羊」打邊爐，今次係我第三次去「小肥羊」
佢o的羊唔算好"蘇"，羊肉加埋麻辣真係好夾好好味。埋單每人約 $190 真係食到好飽，因為係遂碟計所以唔係叫好多，兼且盡量清哂o的野食 (當然任食都唔好浪費啦！)
之後好飽都走去食糖水，席間得知陳生o岩o岩做人老豆，我地一個二個初初都已為佢講緊笑，因為幾年已o黎都無聽佢講佢結o左婚，加上以前打機晚晚打到十一二點，今次真係估佢唔到 
係度恭喜陳生先 
話時話呢個係我今年知既第七個豬 BB 啦，金豬年真係多o的人生。 
鴛鴦煲 - 一邊麻辣一邊清湯
Friday, December 07, 2007
電腦故障
經過呢幾日，部電腦個症狀越o黎越嚴重，尋晚自動熄機兩次，到半夜先著得返，睇 forum 原來好多人都有咁既情況，佢地分別係 CPU / GPU 過熱或火牛夠期，除塵或換火牛就搞掂。今晚再 check 真o的部機，希望唔係底版有事喇，唔係就大鑊，如果真係咁就買過部新機算啦，橫豎都唔打機，換返部 iMac 玩，睇 guided tour 個新 OS
Leopard 好正，部 iBook 都用o左五年，新 OS 同 software 都開始唔 compatible 啦，想玩新野唔 upgrade 唔得，不過換都係要出年先換得，一來要儲錢二來等o的人試多o的 fix 多o的 Leopard 先。
想知 Leopard 有幾勁同幾好玩可以去 apple 個網睇o下佢個 Guided Tour
http://www.apple.com/macosx/
Thursday, December 06, 2007
綠楊板前
荃灣綠楊香新裝修成新派商場，有好多新食肆開張，其中出名既「板前壽司」都係樹立支旗。雖然「板前」已經變o左「元氣」既高級版，但因為荃灣好食既迴轉壽司唔多，開係綠楊可以講話係集天時、地利、人和於一身，計過度過點都有 "so" 既，於是尋晚我同o的同學去試試啦！帶子壽司 - 食落o的飯重係暖暖地架，但又不失帶子既鮮味 
一碟係饅魚一碟係三文魚春卷 - 只係食到o的配菜味，饅魚同三文魚味一o的都食唔出
鮑魚軍艦 - 味道一般 
蟹棒壽司 - "賣飛佛"，保持水準無得彈 
三文魚壽司 - 味道一般的無難度
油金魚壽司 - 上面o個舊唔知係乜，食落好多根，差 $5 早知叫油金魚腩啦！
南瓜天婦羅 - 炸得唔錯，如果可以切食一塊塊會更好
軟殼蟹手卷 - 軟殼蟹脆脆地好新鮮，不過「元氣」候有埋無沙津醬好味o的
燒尤魚壽司 - 食落成口糊哂，唔o岩我食 
燒豚肉壽司 - 唔知係咪整o左好耐，o的肉乾哂不過味道 OK，如果新鮮會重好味！
埋單總共 $407，四個人食到飽飽算 OK 啦，不過大家都話要排咪搞，去「元氣」食好過。同場加影 - 同學 G 整既朱古力味蛋糕，好味架 
Wednesday, December 05, 2007
部 PC 又自動熄機開唔返...
今朝一開部機無耐又自動熄機，之後點整都開唔返，趕住返工暫時唔搞住今晚返屋企睇下有無得醫。
而家部機有幾個病証！
1) 開機無耐用用o下會"o播"一聲成部機熄哂，"禁"個 power 掣都無反應，但就一點綠色燈閃閃o下，之前試過兩次，即刻開係開唔返，過左幾粒鐘後又會開得返。
2) 開機無耐入 windows 幾分鐘後會 hang 機，即係成個畫面 freeze o左，"禁" reset 掣後會話搵唔到個 boot up drive，不停 reset 都唔得，要入返個 system disc，但熄o左佢過一排有時又得喎...
3) 呢個情況暫時只試過一次；hang 完機後話 keyboard error，但我將個 keyboard 換係部 ibook 度好正常，又試過換另一個 keyboard 比部 PC 都唔得，熄機開機幾次都唔得，後尾靈機一動將個電源線 unplug 再插點知就無事可以認返個 keyboard...
部機用o左兩年一直都相安無事，hang 機情況 5 隻手指數得哂，但自從裝左卡巴斯基後兩個星期就經常 hang 機，不過同事 J 話一個軟件唔會搞到部機咁，唉！總之而家好煩啦，用 PC 時唔知佢幾時會休克...
Tuesday, December 04, 2007
Monday, December 03, 2007
Saturday, December 01, 2007
柳暗花明又一村
尋晚放工六點鐘即刻閃去旺角朗豪坊奧林巴斯維修中心，因為佢地收七點，時間上唔算好趕，約半個鐘就去到。奧林巴斯 CS o的人態度非常好，細心咁幫我檢查我所講既問題之後就講解費用，不過由於師傅已收哂工要下星期先會有人報個大約維修費，而家只係放底 100 蚊做檢查費先。
搞掂後就係朗豪坊行行，呢度週圍都佈置o左聖誕既飾物，好有氣氛同好靚。晚飯去o左女人街入面o的餐廳食，今次揀o左夫泰國菜，o的野都唔平，叫o左兩樣野埋單差唔多要 100 蚊，味道不過不失，唯獨是服務生態度唔錯，飯後有免費既甜品供應，難得。
生牛肉金邊粉
辣椒膏海鮮炒飯
食飽返屋企再搞o下部 PC，無啦啦又著得返，問過高人話好大機會係壞火牛，今日返去再 check 真o的。
Friday, November 30, 2007
黑色星期五之屋漏兼逢連夜雨
好黑仔啊~~~~
今朝屋企部電腦用用o下突然熄o左開唔返，自從裝左卡巴斯基 Internet Security 後就成日有問題，又 freeze 又自動熄機，上星期六直頭搵唔到個 c drive，後尾比我搞搞下又入得返 windows，o個日係裝卡巴斯基既第二日... 千奇唔好死 HDD 呀，我重有套日劇係入面未燒碟架
部相機個 setup 轉盤同 zoom 制好似漏油咁 kick 住唔 smooth，都唔知發生乜事，部機都有成半年無用過架啦，唔知係咪因為少用呢，不過影出黎o的野重好 OK，今晚放工拎去維修中心睇下有無得醫，唉，部機已經過哂保養架啦，希望唔會好貴啦...
臨拎去整用佢影多幾張相先！
頭先同同事出老深食飯，見到隻想買好耐既舊 game 平左兩蚊，於是咪比錢囉，點知呢頭比完錢，o個頭係第二個商場賣 $268，足足平多 $30，前後唔使兩分鐘...次次買親野都係咁架，睇樣野個幾月都無乜跌價，一買唔使好耐就會見到平貨，唔通呢個係我既宿命？？！！點解我唔係姓李呀？！
Thursday, November 29, 2007
日式烏冬
上次去日本中部旅行時見個盒好靚於是買黎送比公司兩個比較 friend 既同事。
呢張係同事 C 煮完影o左張相匯報比我，佢重專登整o的配菜o黎影相，幾專業！！
根據同事 C 講個麵豉湯咸o左少少，不過烏冬都好彈牙。
根據同事 C 講個麵豉湯咸o左少少，不過烏冬都好彈牙。Wednesday, November 28, 2007
陳年 Lomo
呢部 Lomo 機仔係一個舊同事個朋友讓比我，都差唔多 10 年前啦，記得當時一部全新既 Lomo 賣緊千幾四蚊到，o個時覺得好貴，咁o岩舊同事既朋友想放於是我用左五舊水拎左返屋企，試影過幾筒菲林之後就收埋左佢。
呢幾日又留意返 Lomo o的消息，原來個價已升到 $1980，值唔值真係見人見智啦。
Tuesday, November 27, 2007
Monday, November 26, 2007
Calbee 有薯味既薯條
上次紅葉之旅買既野唔多，但就買左好多零食返黎食，因為o的 friend 個個都買，人就係咁，見人買自己又唔想執書又跟住買。
呢款 Calbee Jagabee 鹽味薯條就係其中一個 friend 介紹既，味道真係好似食緊薯條咁，而且又香又脆，真係越食越想食~~~ 
香港賣緊 $9，價錢差唔多啦。睇o下入o的薯條都唔少架，份量約有個盒一半多o的
除左原味之外，重有幾款味道架，如芝士味，沙津味同牛油味，芝士味都唔錯，好有芝士味架，個盒比原味大少少，不過薯條中間就係空心既，比起實心既原味薯條，各有各味道，不過都一樣咁好味。
另外一款沙津味就真係麻麻，可能隻味無芝士同原味咁香口啦，至於牛油味就未試過。芝士味賣得貴o的要 $14.9 ，我係日本買 100 yen 之麻... 
Sunday, November 25, 2007
名古屋 - 千里馬藥局
如果大家有機會去名古屋，一定要o黎呢間藥局睇睇，呢度除左 2 - 4 樓賣藥品，化妝品之外，地下o個層有好多零食賣，而且全部都好平，比出面平幾十至幾百 yen 都有架，例如一盒"飛之膏"要 7xx yen 呢度只要 630 yen，另外一盒卡樂 B 薯條係便利店賣緊 148 yen 呢度賣 100 yen，我都係千里馬度執到唔少平貨 
如果我無記錯，係高島屋背住四條電動樓梯一直行到尾會有個小廣場，係對面馬路有間好大既 Bic Camera，千里馬就係廣場既左邊．
Friday, November 23, 2007
Thursday, November 22, 2007
秋日紅葉飄雪日本中部六天自遊行 2007 - 後記
今次日本中部行程都算輕鬆，因為白川鄉同高山都係o的鄉村小城市，o的舖好早都收工，無野行自然返旅館休息，所以唔會好似係東京咁行到夜一夜，去旅行變左去勞役咁。以下係我少少對香港服務員既感想。
- 機 場 3 個服務員好唔專業，事原我聽我朋友話 123 係日本打 home call 會比慢遊 IDD 平，於是我去 3 度問佢地有無呢個服務，但係個職員就話想係日本打電話一係要 3G 機加 3G plan，一係就買張慢遊儲值咭，我聽完之後心諗唔係呀麻，個個台都可以 3G 機加 2G plan 係日本打電話返香港架啦，3 反而唔得？！後尾我去到日本照開個電話一樣可以用囉... 好彩無比佢呃而買張儲值咭。
- 機場 check in 時 CX 個地勤空姐問都無問就將我地 5 個人分到散哂，上到機我地先知，機倉空姐就好好人叫我地坐底先，等o的人上哂機就幫我地掉位，不過後尾我地自己搞掂左，係呢度多謝o個日o個位空姐。
Wednesday, November 21, 2007
秋日紅葉飄雪日本中部六天自遊行 2007 - DaY sIX
11月15日
今日返香港啦，係酒店執好行李，跟手落 lobby check out，將o的行李寄存係酒店先，又出去買手信啦。
由於搭下午 4：30 分機返香港，大約兩點鐘要去到機埸，買哂手信搭 1：32 分火車去機場。
個機場好大，拍得住香港機場，但人流唔多，行o的舖頭行得好舒服。另外二樓商店及食店裝修得好有特色，一邊係古代日本式而另一邊係歐陸式，好靚。
日本古代 feel
歐陸式
係機場都係離唔開購物，我因為唔想再用o的紙幣而忍手唔買，不過都買左個麵包超人交剪比我個妹。買o個時唔記得交剪唔可以 hand carry，過關時比人查先醒起唔帶得，心諗慘啦，side 哂o的錢，我問個工作人員可唔可以寄快遞，佢望望我本 passport 又望望隻錶，跟住嘆口氣話唔得，不過除左交剪之外既野都可以拎走。咁都無咁傷，於是我就拎走個交剪套同個包裝，好彩個交剪無乜圖案o者。
Tuesday, November 20, 2007
秋日紅葉飄雪日本中部六天自遊行 2007 - DaY FivE
11月14日
今朝搭 8：00 班車返名古屋，車程要 2 個鐘零 45 分，起初個天重灰灰地，好彩之後見返藍天白雲，落左幾日雨終於好天啦，遺憾係白川鄉落雨影唔到靚相。約 10:45 分到達名古屋，去到酒店因為太早未到 check in 時間，唯有放底行李係酒店 lobby，跟住出去行行。
買張名古屋地鐵一日卷，方便來回。搭地鐵去明城公園，搭幾個站好快到。個公園好普通，無乜做保養，花花樹樹都好舊，好少見日本政府會咁唔理。好休閒
無幾遠就係名古屋城，本來想慳錢唔入場就咁係出面睇，不過原來出面係睇唔到既，唯有放棄繼續去 shopping。
我地去左名古屋最大既地下商場行，o個度有好多食店鋪頭，行到累我地入左一間咖哩店食午餐，呢度好香咖哩味，重有好多唔同款既咖哩飯任君選擇。我簡左個咖哩雞湯 set，其實都幾好味，不過相比起佢地食既咖哩飯就唔夠香濃喇。
食飽飯返酒店 check in 後再搭地鐵去名古屋附近行街加 shopping，又幫個朋友買左個最新款既狗仔袋，店員話o岩o岩出左五日，夠哂新鮮熱辣。
跟手行去附近食鰻魚飯，呢度o的鰻魚係用炭燒出黎，好香又夠脆同多汁，正。
真係用炭燒o架
之後去左‘千里馬’買手信，呢度o的手信好平，我地係度狂掃零食，‘千里馬’樓上重有幾層係賣化妝品同埋藥品，價錢比一般店舖平，個個係呢度都買得好盡慶。
買完野返酒店休息。
Subscribe to:
Posts (Atom)