Halloween
Halloween 大家有無節目呀？
呢間日本 office 用 mario 做主題佈置到好有 halloween 氣氛，雖然一i的都唔恐怖但就好得意好有趣。link
Wednesday, October 31, 2007
Saturday, October 27, 2007
荃灣三陂坊 - 泰廚
尋日 BB 同o左佢 Daddy Mummy 去阿爺o個樹食飯，咁我地三條友就好得閒，又唔想煮，於是去我同事成日話好食既泰式食店試試。地點係荃灣三陂坊，一行入去原來入面別有洞天，一欄好多食店，中式野多，其他就係打邊爐，Cafe 同埋呢間泰式野 - 泰廚。
行到尾尾唔難搵，去到個侍應招呼我地，我見入面有位想坐入面，不過個侍應話唔係好熱不如坐出面，咁算啦，費時嘈。坐底無耐就有一檻蝦片送上。
阿媽想食泰式拼盤，蝦餅唔錯，同青胡椒有得揮
咸魚抄介蘭，無咸魚味既 ~o~;;
咖哩雞，又幾好味喎
肉碎生菜包，麻麻地，青胡椒同 Venus 整都好食過佢
後尾我見到原本我想坐o個個位比人坐o左，都係三個人，雖然坐出面坐入面其實都無所謂，但係就唔好一開頭就唔比我地入去坐啦！呢間野雖然未至於難食，但又唔見得好食到要回頭囉，下次去返青胡椒算。
Tuesday, October 23, 2007
2007 年秋季日劇 - 「醫龍 2」
前幾日講完上季日劇，今次又講下今季日劇啦，今季日劇o岩o岩出左兩集，其實都未講得好唔好睇，不過今季。。真係要講下。
開頭都無乜期望，本住有得睇咪睇下囉，點知第一集個氣氛可以拍到咁正，主角係差唔多同一時間要面對 3 個手術，搞到無睇過第一輯既我都好緊張，簡直有抖唔到氣既感覺，好多人講呢集直頭可以當做 SP 咁做，亦有人擔心第 1 集拍到咁既水準，之後o個 10 集唔知承唔承接到，不過「醫龍 2」暫時只係做左兩集，o的人擔心有少少言之過早，睇多幾集先再擔心都未遲，而我就因為睇完第 1 集比佢個振撼力感染左，花左幾日時間追左第 1 輯（第 1 輯係 2006 年做），覺得「醫龍 1」唔比「醫龍 2」差，集集都有手術做之餘，亦唔會有太多感情線或四五六七角戀，人物塑造得好清晰，主角同佢o的戰友每集都要面對唔同既病患者，睇到醫生們既奮鬥、病人勇敢咁面對同求存，睇到我都好感動，比 TVB o個o的乜野劇好睇千萬陪月，最起碼唔會睇黎睇去都係o個幾個藝員樣同千篇一聿丫~~~！！
不過講返轉頭，我無睇過「妙手仁心」，唔知佢到底拍成點，可能比「醫龍」更出色更正都唔定，如果有人睇過「妙」同「醫」既請你地比o的感想啦！
想知多o的可以去官網望望
http://wwwz.fujitv.co.jp/iryu2/index.html
Sunday, October 21, 2007
Friday, October 19, 2007
Thursday, October 18, 2007
Street Fighter IV
嘩嘩嘩，估唔到而家會出新既 Street Fighter，GameVideos.com 度有段 trailer，畫風係用水墨 feel，無得頂呀！雖然自己好少去機舖打機，不過以前都有買隻 game 返屋企打，重打到手指起"枕" XD 睇完段 trailer 真係好懷念以前。
想睇多o的 trailer 可以去呢度
2007 夏季日劇
2007 夏季日劇做完o左腳一段時間，數數手指今季自己都追好多套，一共有 7 套，其中「ホタルノヒカリ」(螢之光)同「ライフ」(Life 人生)係今季比較好睇既，其實開頭無諗住睇呢兩齣，不過睇過 forum 話唔錯，又見悶悶地所以睇埋。
「螢之光」真係比到意外驚喜，本身唔多鍾意綾瀨遙，可能因為佢之前o的戲比較灰同負面，今次佢做一個傻大姐感覺都幾好，故事係改編自同名漫畫，係講一個好頹既主角，幾年o黎都無拍拖，格言係「去拍拖不如留係屋企訓教」，其實內心係好渴望愛情既，一日，偶然同o左公司既部長同住一間屋，另一方面又有一位公司形男主動親近佢...
「Life 人生」就係講校院欺負事件，重有教師同學校為o左自己對欺負事件不聞不問，而故事就係講主角點樣去面對。我一路睇一路鬧，真係睇到"蚊"哂架，尤其主角成日唔想反抗，任人欺負，睇到眼火爆！！
至於之前睇好既「花樣少男少女」、「First Kiss」反而覺得麻麻重有o的悶添，其中「花樣」個男主角小粟旬真係勁唔掂，同吳尊無得揮，頭幾集佢個獨眼髮形見到都 O 哂咀，重要以為自己好形... 反而女主角堀北真希就比 S.H.E. 既 Elle 好好多好多，起碼個樣唔會成日鼓起成隻雞泡魚咁！
其餘「偵探學院 Q」、「峰壁雙妹傳」就普普通通不過不失。
Monday, October 15, 2007
Saturday, October 13, 2007
Friday, October 12, 2007
尖沙咀 - 萬豚屋
今晚約o左o的朋友傾 11 月去日本o的野，其實都無乜好講因為已經係 e-mail 度講哂，今次係我今年第三次去日本，自己都估唔到去咁多次，（對上一次出 trip 真係意料之外），不過就係第一次睇紅葉，睇過o的雜誌同o的人影既相都好靚，今次真係要親身去感受o下。
今次聚會既地方係尖沙咀萬豚屋，聽講呢度o的烏冬好得。
呢個就係好出名既濃湯海鮮烏冬，用石鍋上，好熱，上檯時o的湯重係滾住，要快手食因為好快就會痴底。我覺得味道一般，但係o的烏冬就好彈牙。
一口牛肉，一般般
唔記得乜名，OK 好味
重有一碟咖哩豬扒飯，o的豬扒好鬆化，不過遠得制無影相。
Monday, October 08, 2007
新口味 - 楊芝甘露
屋企樓下間甜品舖開業都一年啦，晚晚食完飯經過都想食不過因為o岩o岩先食飽飯真係食唔落，今晚經過時見到有新口味又食得落，於是就同屋企人試下，佢地就食普通野我就試呢個「楊芝甘露」。
試過比起出面街食到o個o的「楊枝甘露」結好多，重好大陣芝士味，反而o的生果就少o左o的，不過整體都唔錯幾好食，而家夜晚經過都心思思想走入去食多次。
Saturday, October 06, 2007
Wednesday, October 03, 2007
沢尻エリカ黑面事件
憑一公升的眼淚走紅既沢尻エリカ，比人話態度唔好都唔係第一次，今次 28/9 係自己有份拍既電影首影記者招待會上面全程黑面，司議問拍呢齣戲有乜難忘野，佢答：無，無乜特別。成個記者會只係講左三句野，個女司議諗住幫佢 dau 返不過沢尻就一於我行我素繼續黑面，聽我係日本讀書既朋友話佢將私事帶埋上台，呢件事唔使講都知唔方好佢去邊，至於係乜事就唔知啦。
今次呢件事對沢尻既影響一定唔少，佢個事務所已經抽起左唔比佢去韓國電影節，好多廣告商都唔再用佢，聽講話佢 2008 年成年都無 job 做，想係日本藝能界發展假少少都要做好o的門面野架喇。沢尻能唔能夠繼續係日本藝能界生存就要睇佢之後點樣補鑊啦。
Tuesday, October 02, 2007
Samsung SGH-i780 (BlackJack 2)
早幾日先講過話對 Palm 部 Centro 好有興趣，話口未完比我見到 Samsung 呢部 PDA phone，樣子同功能都唔差，有哂一般人既需求，比起 Palm o個部真係勁好多，唯一唔好就係行 WM。
而家睇返 Palm o個部個 screen 又細，又未知有無 3G，Wi-fi，唉，Palm 真係唔爭氣...
Subscribe to:
Posts (Atom)