2007 年秋季日劇 - 「醫龍 2」

前幾日講完上季日劇，今次又講下今季日劇啦，今季日劇o岩o岩出左兩集，其實都未講得好唔好睇，不過今季。。真係要講下。

開頭都無乜期望，本住有得睇咪睇下囉，點知第一集個氣氛可以拍到咁正，主角係差唔多同一時間要面對 3 個手術，搞到無睇過第一輯既我都好緊張，簡直有抖唔到氣既感覺，好多人講呢集直頭可以當做 SP 咁做，亦有人擔心第 1 集拍到咁既水準，之後o個 10 集唔知承唔承接到，不過「醫龍 2」暫時只係做左兩集，o的人擔心有少少言之過早，睇多幾集先再擔心都未遲，而我就因為睇完第 1 集比佢個振撼力感染左，花左幾日時間追左第 1 輯（第 1 輯係 2006 年做），覺得「醫龍 1」唔比「醫龍 2」差，集集都有手術做之餘，亦唔會有太多感情線或四五六七角戀，人物塑造得好清晰，主角同佢o的戰友每集都要面對唔同既病患者，睇到醫生們既奮鬥、病人勇敢咁面對同求存，睇到我都好感動，比 TVB o個o的乜野劇好睇千萬陪月，最起碼唔會睇黎睇去都係o個幾個藝員樣同千篇一聿丫~~~！！

不過講返轉頭，我無睇過「妙手仁心」，唔知佢到底拍成點，可能比「醫龍」更出色更正都唔定，如果有人睇過「妙」同「醫」既請你地比o的感想啦！

想知多o的可以去官網望望
http://wwwz.fujitv.co.jp/iryu2/index.html

Read More...

Summary only...

2007 夏季日劇

2007 夏季日劇做完o左腳一段時間，數數手指今季自己都追好多套，一共有 7 套，其中「ホタルノヒカリ」(螢之光)同「ライフ」(Life 人生)係今季比較好睇既，其實開頭無諗住睇呢兩齣，不過睇過 forum 話唔錯，又見悶悶地所以睇埋。

「螢之光」真係比到意外驚喜，本身唔多鍾意綾瀨遙，可能因為佢之前o的戲比較灰同負面，今次佢做一個傻大姐感覺都幾好，故事係改編自同名漫畫，係講一個好頹既主角，幾年o黎都無拍拖，格言係「去拍拖不如留係屋企訓教」，其實內心係好渴望愛情既，一日，偶然同o左公司既部長同住一間屋，另一方面又有一位公司形男主動親近佢...

「Life 人生」就係講校院欺負事件，重有教師同學校為o左自己對欺負事件不聞不問，而故事就係講主角點樣去面對。我一路睇一路鬧，真係睇到"蚊"哂架，尤其主角成日唔想反抗，任人欺負，睇到眼火爆！！

至於之前睇好既「花樣少男少女」、「First Kiss」反而覺得麻麻重有o的悶添，其中「花樣」個男主角小粟旬真係勁唔掂，同吳尊無得揮，頭幾集佢個獨眼髮形見到都 O 哂咀，重要以為自己好形... 反而女主角堀北真希就比 S.H.E. 既 Elle 好好多好多，起碼個樣唔會成日鼓起成隻雞泡魚咁！

其餘「偵探學院 Q」、「峰壁雙妹傳」就普普通通不過不失。

Read More...

Summary only...

求婚大作戰

今次要講講我最鐘意既日劇「求婚大作戰」。

「求婚大作戰」故事講男主角參加愛人既結婚典禮，係播影回憶照片時男主角好後悔點解無膽去表白而眼白白睇住心愛既人比人搶走，呢個時候住係教堂既妖精聽到男主角既心聲，於是就主動幫佢...

呢套屬於 07 年春季日劇，雖然係上季，不過故事、人物描寫等都得好好，而男女主角係由人氣既山下智久同長澤雅美飾演，兩個我都好鐘意，加上幾個配角都各有性格，加埋一齊就發生呢個化學作用。表面上睇o黎「求婚大作戰」屬於青春愛情片，其實話佢係勵志片都不為過，因為片中所帶出既訊息係範事唔好等第二日，要把握每個機會，同埋過去既野點樣都改變唔到，最重要係改變將來！

中文網站 : http://japan.videoland.com.tw/channel/propose/

日文網站 : http://wwwz.fujitv.co.jp/propose/index.html

Read More...

Summary only...